અમેરિકાના મેનહટન સ્થિત ત્રણ ન્યાયાધીશોની કોર્ટ ઓફ ઇન્ટરનેશનલ ટ્રેડે ડોનાલ્ડ ટ્રમ્પે વિશ્વના વિવિધ દેશો પર લાદેલી મોટાભાગની ‘લિબરેશન ડે’ ટેરિફના અમલ પર બુધવારે સ્ટે મૂક્યો હતો. કોર્ટે તેના ચુકાદામાં જણાવ્યું હતું કે પ્રેસિડન્ટે પોતાના અધિકારો ઓળંગીને અમેરિકાના વેપાર ભાગીદાર દેશોમાંથી થતી આયાત પર સાર્વત્રિક ટેરિફ લાદી છે. કોર્ટે જાન્યુઆરીથી ટ્રમ્પ દ્વારા જારી કરાયેલા ટેરિફ ઓર્ડર પર કાયમી મનાઈહુકમ જારી કર્યો હતો. વિશ્વભરના ફાઇનાન્શિયલ માર્કેટે કોર્ટના ચુકાદાને આવકાર્યો હતો અને અમેરિકાના ડોલરમાં તેજી આવી હતી.